I5 – Виница – Лесново – Паланка – 142km

Основни Податоци:

• Должина: 142Км
• Елевациски профил на секцијата:

GPS запис:

Записот за секцијата I5 ( Осоговска Трансверзала ) е комплетен со сите траки, маркери, слики од точки од интерес и додадена дигитална елевација. Било какви забелешки се добредојдени, посебно околу функционалноста, начинот на изработка и приказ и слично

Превземете го комплетниот GPS запис (KML формат ) од оваа секција ТУКА

Објаснување за значењето на маркерите , типовите на стази и бои кои се користат може да прочитате ТУКА

Google МАПА : ( Како се користи ? )

Позначајни врвови достапни непосредно или преку странични патеки:

Опис/Статус:

Виница – Магистрален пат А3

Секцијата започнува во близина на градот Виница, односно од магистралниот пат Виница-Берово, на надморска висина од 400м што е воедно и најниска надморска висина на оваа секција. Патеката започнува со поминување на мостот на река Осојница и во првите 800м до мостот на река Сушица води низ широк земјен пат. По поминувањето на Сушица патеката почнува да се искачува по Јакимовски рид и низ стар селски пат води во правец на селото Црн Камен, каде скршнува кон исток и полека навлегува во шумски појас од мешана зимзелена и листопадна шума. Трасата потоа продолжува северно и поминува во подножјето на врвовите Долна Китка и Киселица за полека да се спушти до мостот на река Брегалница и да го пресече магистралниот пат Кочани-Делчево.

Состојба: Патеката во овој сегмент почнува со широк земјен пат, а по кратко време продолжува мешано по стари селски и шумски патишта за по изминувањето на врвот Киселица да води претежно по планинарски патеки се до реката Брегалница. Маркација и ознаки нема никаде, меѓутоа со само мала помош на ГПС сигналот патеката е лесна за пратење. Има само едно до две места каде патеката во моментов е малку обрасната со план набрзо да биде исчистена.

Магистрален пат А3 – Гратче

Од магистралниот пат А3 патеката се префрла на Осоговските планини и до крајот на секција I5 ги обиколува истите, па затоа и оваа секција го доби името Осоговска Трансверзала! Прво се издигнува по падините на Петров Рид а потоа скршнува западно и преку ридовите Падарница и Попова Чука води до убавиот манастир „Добра Вода“. По одминување на манастирот трансверзалата се спушта до Оризарска река каде скршнува северно и води возводно низ убавата долина на Оризарска река се до подножјето на Вранински рид каде се искачува до атарот на село Вранинци а потоа преку падините на врвот Црква се префрла кон областа Горно и Долно Гратче. Во продолжение патеката води преку локалитетот Мактеон и по источните ридови над Кочанското Езеро се спушта до Велика Река и Гратчевскиот водопад а овој сегмент завршува кај Мотелот Гратче на брегот на Кочанското езеро. За време целиот овој сегмент патеката се движи претежно по шумски појас, наизменично по зимзелена и листопадна претежно дабова шума, а повремено се отвараат убави широки погледи кон кочанската котлина а потоа и кон кочанското езеро.

Состојба: Трансверзалата во овој сегмент започнува по убав стар шумски пат но набрзо преминува во тесна планинарска патека и со мали исклучоци каде се оди по широки шумски патишта, патеката до крајот на овој сегмент води по убави планинарски и козји патеки. Маркација има само во делот на долината на Оризарска река и во еден дел кај Кочанското езеро, меѓутоа нема честа потреба од погледнување на мапата т.е. на ГПС сигналот. Патеката е во добра состојба освен во два-три кратки делови означени на мапата каде е обрасната и потребно е расчистување.

Гратче – Козји Карпи (Раткова Скала)

Од Кочанското езеро ( Гратче ) патеката започнува со солиден наклон да се издигнува повисоко по падините на Осоговската планина, но веќе по неколку километри наклонот да се намали и трасата понатаму продолжува претежно со благ наклон блиску до движење по изохипса. Патеката го пресекува локалниот асфалтен пат кон Пониква и продолжува со исто темпо по падините на Осогово, а сценографијата по патеката се менува често помеѓу зимзелена, ниско и високостеблеста листопадна шума, планински ливади, пасишта, како и повремени прекрасни пејсажи кон котлината и спротивната Плачковица. По поминување на превојот меѓу Пржар и Престрел кое се наоѓа на 1120м надморска висина трансверзалата продолжува по стар шумски пат а амбиентот позабележително се менува кон планински. Овој сегмент завршува кај месноста Козји Карпи од каде се пружа најубавиот поглед кон карпите на Раткова скала и длабокиот кањон на Шталковичка Река. Воедно од тука води и алтернативна т.е. опционална патека до врвот Раткова Скала.

Состојба: Маркирана планинарска патека има само во делот на првичното искачување од Кочанското езеро. Трасата е во најголем дел по планинарски патеки меѓутоа има неколку пократки делови по широк шумски пат. Пазење на ГПС сигналот е потребно на повеќе места а целата траса е во солидна состојба со само неколку кратки обраснати делови.

Козји Карпи – Лесновски пештери

Од Козји карпи трансверзалата низ убава листопадна шума преку старите патишта од некогашниот рудник се спушта до почетокот на кањонот на Шталковичка река и Шталковскиот водопад, продолжува по широк шумски пат кон село Шталковица а потоа се издигнува низ козја патека во правец на Ратковица каде повторно по широк шумски пат продолжува по билото кон Голак и пратејќи го сртот по убава патека претежно по ливади и пасишта се спушта до мостот на Злетовска река на влезот на Злетово. Трасата го пресекува Злетово и преку искачување на Лесновскиот рид стига до Лесновските пештери.

Состојба: Патеката во делот од Козји Карпи до Шталковскиот водопад е свежо расчистен на некои места и со лентова маркација. Од водопадот до Злетово патеката не е маркирана но е проодна и чиста без честа потреба од следење ГПС. Делот од гробиштата над Злетово па се до пред спуштањето кај Лесновски пештери се одвива по козја патека која во горната половина е маркирана а во долниот дел и во делот од спуштањето до пештерите нема голема потреба од пазење на ГПС.

Лесновски пештери – Емиричка Река

Од Лесновски пештери патеката за многу кратко излегува и го преминува асфалтниот пат кон Лесново кај Бело Место и води генерално по сртот кон Илин Врв ( Достапен по странична патека ), го заобиколува врвот од западната шумска страна и излегува на широкиот пат кој води од Лесново до врвот Уво. За многу кратко трансверзалата се одвојува од овој широк пат и од тука почнува еден од најживописните делови од целата секција I5, каде природата е сеуште нечепната од модерните текови. Трансверзалата продолжува цело време по козја-планинарска патека, најпрво по дел од старата монашка патека, а потоа по ново трасирана патека која води по сипари , прекрасна букова шума и повеќе убави водопади кои го карактеризираат овој сегмент. По спуштањето во прекрасната долина на Злетовска река, трансверзалата ја поминува реката и за кратко излегува на локалниот асфалтен пат кој води до вливот на Емиричка река.

Состојба: Во овој сегмент нема никаде маркација, меѓутоа на некои критични места е поставена привремена лентова маркација за полесно снаоѓање бидејќи се работи за претежно нова сеуште неразгазена патека. Сеуште има делови на кои е потребно подетално расчистување меѓутоа нема некои поголеми обраснати делови. Сепак, познавање на следење на ГПС трака е задолжително.

Емиричка Река – Царев Врв

Од асфалтниот пат кој води кон браната Кнежево патеката веднаш ве внесува во длабока шума по текот на Емиричка река богата со слапови и неколку вирови, а потоа ве издигнува до атарот на Емирица, поминувајќи го локалитетот со 10-те црквички и понатаму до седлото помеѓу врвовите Борова Глава и Вршник каде излегувате на широк земјен пат. Патот ве носи по билото или веднаш под него поминувајќи покрај Курмина, Мртвички рид, Маркова Ступка и на крај до пред самиот врв Царев Врв ( Султан Тепе ).

Состојба: Патеката во делот покрај Емиричка река и Емирица е ново трасирана и без маркации, со неколку помалку обраснати делови и со помош на мапата и ГПС лесно се поминува. По излезот на широкиот земјен пат иако без маркации патеката е јасна се до крајот на овој сегмет, т.е. до Царев врв.

Царев Врв – Осоговски Манастир

Од Царев врв трансверзалата се спушта повторно по широк пат преку пространите ливади пратејќи го сртот се до месноста и езерото Калин Камен, а малку понатаму се одвојува од сртот и врти на запад и преку длабока шума се спушта до Станечките водопади. Од Станечките водопади патеката продолжува да се спушта низ живописната долината на Козја река за да на неколку стотини метри пред вливот во Станечка река да скршне повторно на север низ месноста Басјанско. Трансверзалата продолжува со благ наклон по убава планинарска патека а потоа и по широк шумски пат ве води до самиот Осоговски Манастир, поточно излегува на асфалтниот пат помеѓу долниот и горниот влез на манастирот.

Состојба: Од Царев Врв до Калин Камен патеката е јасна, маркирана и редовно посетувана од планинари. Понатаму кон Станечки водопади и покрај Козја река на теренот се извршија многу промени на патеката со пробивањето на широк пат во последните 2 години, така да старата планинарска патека е уништена а на тие делови сега има широк пат со мостови за премин преку реката. Од одвојувањето од Козја река па се до Осоговски Манастир нема никаква маркација меѓутоа за следење на истата потртебно е само повремена помош од ГПС сигнал.